Det som byrjar med hårspray, kjoletrøbbel og søskenkrangel blir eit eksplosivt oppgjer mellom generasjonar med draumar, skuffelsar og svik. Når natta fell på og festen kokar over, er det ingen som slepp unna.
Beth Steels kritikarroste «Til stjernene fell ned» er eit varmt, vittig og nådelaust familiedrama om kjærleik, stoltheit og tilhøyrsle. Gjennom éin einaste dag og ein stadig meir kaotisk bryllaupsfest trer ein heil familie fram i all si skjønnheit og skam.
Med skarpt språk, mørk humor og eit usedvanleg presist blikk for menneskeleg åtferd viser stykket korleis vi blir forma av det vi kjem frå, og kor vanskeleg det er å sleppe taket i dei vi kallar våre eigne.
Kva skjer når den lukkelegaste dagen i livet vårt opnar døra til alt vi eigentleg ikkje snakkar om?
«Til stjernene fell ned» hadde urpremiere på National Theatre i London i januar 2024 og har fått strålande omtalar. Den blei då mellom anna omtalt som «magnificent theatre» og «a gloriously messy affair» av britisk presse.
