Improteater om naboen din
Livet til naboen din blir løfta opp på teaterscena for éin kveld!
Vi har invitert Det Andre Teatret til å reise rundt i grendehus i Vestland og feire kvardagsheltane våre, dei som alltid stiller opp og er med og formar bygdene. Éin gjest på kvar spelestad blir intervjua om både det indre og ytre livet sitt, og så improviserer skodespelarane fram scener.
Nesten som om livet går i revy.
Spelet om livet – Lifegame® gjestespel frå Det Andre Teatret kombinerer talkshow og teater utan manus, eit konsept utvikla av improvisasjonspioneren Keith Johnstone.
GJESTENE
Kvardagsheltane er nøye utvalde på førehand. Skal vi endeleg få svar på kva som skjedde den gongen grendelaget si grillhytte brann ned? Kva er det eigentleg naboen din tenker – og kva fryktar han mest av alt?!
LYS I BYGDA
Sogn og Fjordane-delen av turneen er sponsa av eit billettfond frå Sparebank 1 Sogn og Fjordane. Det betyr at spelestadene i Sogn og Fjordane beheld alle billettinntektene sjølve. Vi kallar det Lys i bygda.